دمصر په زیاتره سیمو کي مصریان تیره ورځ دجمعې ترلمانځه وروسته لارو کوڅو ته راووتل او ددې هیواد دپخواني ولسمشر محمدمرسي په ملاتړ يې مظاهرې وکړې.

داخوان المسلمین په زرګونو پلویان په قاهره، اسکندریه، فیوم، شرقيه او داسي نورو سیموکي راووتل او داوسني موقت حکومت په خلاف يې شعارونه ورکول، مظاهره کونکو له پولیسو او امنیتي کسانو سره شخړي وکړې، پولیسو په مظاهره کونکو ډزي کړي.

دمصر روغتیايي چارواکي وايي، دتيري ورځي په مظاهرو کي ۳ کسان وژل شوي او ۲۸ تنه نور ټپیان شوي دي، همداراز په لسګونو کسان دپولیسو له لوري نیول شوي هم دي.

دمصر روغتیايي چارواکو ویلي، دقاهرې په شاوخوا کي دمظاهرو په ترڅ کي دپولیسو له لوري درې کسان وژل شوي او ۲۳ تنه نور ټپیان شوي دي، په همدې ډول په اسکندریه کي یو تن ټپی شوی، په فیوم کی دوه تن ټپیان شوي.

له بله پلوه اخوان المسلمین په یوه بیان کي ویلي، دتیري ورځي په مظاهرو کي ددوی ۸ تنه پلویان دپولیسو په مخامخ ډزو کي وژل شوي او په لسګونو نور ټپیان شوي او نیول شوي دي.